केज | प्रतिनिधीकेज नगरपंचायतच्या मंगळवार, दिनांक १६ डिसेंबर २०२५ रोजी झालेल्या सर्वसाधारण सभेत एक अत्यंत महत्त्वाचा आणि ऐतिहासिक ठराव एकमताने मंजूर करण्यात आला. शहरातील शिक्षक कॉलनी परिसरात असलेल्या केज–बीड महामार्गावरील प्रमुख चौकास दिवंगत लोकनेते स्व. गोपीनाथराव मुंडे साहेब यांचे नाव देण्याचा बहुप्रतिक्षित निर्णय अखेर मार्गी लागला. या निर्णयामुळे केज शहरासह संपूर्ण तालुक्यात आनंदाचे आणि समाधानाचे वातावरण पसरले आहे
स्व. गोपीनाथराव मुंडे साहेब हे महाराष्ट्राच्या राजकारणातील एक प्रभावी, दूरदृष्टीचे आणि जनतेच्या हृदयात स्थान निर्माण करणारे नेते होते. ग्रामीण भागाचा विकास, शेतकरी, कष्टकरी, सर्वसामान्य जनतेचे प्रश्न आणि सामाजिक न्यायासाठी त्यांनी आयुष्यभर संघर्ष केला. त्यांच्या कार्याची आणि योगदानाची आठवण म्हणून केज शहरातील महत्त्वाच्या चौकास त्यांचे नाव देण्यात येणे ही नागरिकांच्या दीर्घकालीन मागणी होती.
सर्वसाधारण सभेत एकमताने ठराव मंजूर
केज नगरपंचायतच्या या बैठकीत नगराध्यक्षा सौ. सीताताई बनसोड यांच्या अध्यक्षतेखाली हा ठराव मांडण्यात आला. राष्ट्रवादी काँग्रेस (अजितदादा पवार गट) चे ज्येष्ठ नेते तथा गटनेते हारूणभाई इनामदार यांनी लोकभावनेचा आदर राखत या प्रस्तावाला ठाम पाठिंबा दिला. यावेळी नगरपंचायतमधील सर्व नगरसेवक, अधिकारी आणि कर्मचारी उपस्थित होते.
विशेष बाब म्हणजे, कोणताही वाद न होता, हा ठराव एकमताने मंजूर करण्यात आला, ही बाब केज शहराच्या राजकीय आणि सामाजिक एकोपा दर्शवणारी ठरली आहे. चौकास “स्व. गोपीनाथराव मुंडे साहेब चौक” असे अधिकृत नाव देण्याचा निर्णय घेण्यात आला.
पत्रकार प्रकाश मुंडे यांची पुढाकाराची भूमिका
या चौकाला स्व. मुंडे साहेबांचे नाव देण्याची मागणी पत्रकार व सामाजिक कार्यकर्ते प्रकाश एकनाथ मुंडे यांनी सर्वप्रथम केली होती. त्यांनी सातत्याने या मागणीचा पाठपुरावा केला. मुंडे साहेबांच्या कार्याची ओळख नव्या पिढीला व्हावी, तसेच त्यांच्या स्मृती चिरंतन राहाव्यात, या उद्देशाने ही मागणी करण्यात आली होती.
स्व. गोपीनाथराव मुंडे साहेबांच्या नुकत्याच झालेल्या जयंतीनिमित्त दिनांक १२ डिसेंबर २०२५ रोजी पत्रकार प्रकाश मुंडे आणि त्यांच्या सहकारी युवक मित्रांनी या चौकास “स्व. गोपीनाथराव मुंडे साहेब चौक” म्हणून ओळख निर्माण करण्यासाठी एक जनजागृती मोहीम सुरू केली होती. या उपक्रमाला शहरातील नागरिक, सामाजिक कार्यकर्ते आणि विविध संघटनांचा उत्स्फूर्त प्रतिसाद मिळाला.
नागरिकांमध्ये समाधान आणि आनंद
नगरपंचायतच्या या निर्णयाचे केज शहरात सर्वत्र स्वागत करण्यात येत आहे. अनेक नागरिकांनी हा निर्णय लोकभावनेचा सन्मान करणारा असल्याची प्रतिक्रिया व्यक्त केली. स्व. मुंडे साहेबांचे केज तालुक्यावर विशेष प्रेम होते आणि त्यांच्या अनेक विकासकामांचे साक्षीदार केज व परिसरातील नागरिक आहेत. त्यामुळे शहरातील एका महत्त्वाच्या चौकास त्यांचे नाव देण्यात येणे ही केवळ नामकरणाची बाब नसून, तो त्यांच्या कार्याचा गौरव असल्याची भावना नागरिकांत दिसून येत आहे.केज शहरासाठी अभिमानाचा क्षणस्व. गोपीनाथराव मुंडे साहेब यांच्या नावाने चौक नामकरणाचा निर्णय हा केज शहरासाठी अभिमानाचा क्षण मानला जात आहे. राजकारणापलीकडे जाऊन सर्वपक्षीय एकमताने झालेला हा निर्णय लोकशाही मूल्यांचे उत्तम उदाहरण ठरत आहे. पुढील पिढीला प्रेरणा देणारा आणि सामाजिक स्मृती जपणारा हा ठराव केजच्या इतिहासात निश्चितच सुवर्णाक्षरांनी नोंदवला जाईल.
