लातूर ते कल्याण या बहुप्रतीक्षित जनकल्याण द्रुतगती महामार्ग प्रकल्पाबाबत महत्त्वाची चर्चा सध्या राज्यात रंगू लागली आहे.
मूळ नियोजनानुसार हा महामार्ग लातूर – अंबाजोगाई – केज – जामखेड – अहिल्यानगर मार्गे कल्याण असा प्रस्तावित असून, यात बीड जिल्ह्याचा समावेश अत्यंत महत्त्वाचा मानला जात होता. मात्र अलीकडे हा महामार्ग बीड जिल्ह्याऐवजी धाराशिव (उस्मानाबाद) जिल्ह्यातून वळवण्यात येणार असल्याची चर्चा सुरू झाल्याने राजकीय आणि सामाजिक वर्तुळात तीव्र प्रतिक्रिया उमटू लागल्या आहेत.
या पार्श्वभूमीवर राज्याचे माजी मंत्री आणि राष्ट्रवादी काँग्रेस (अजित पवार गट) नेते धनंजय मुंडे यांनी थेट मुख्यमंत्री देवेंद्र फडणवीस यांना पत्र लिहून, हा महामार्ग अन्यत्र वळवू नये, अशी ठाम भूमिका मांडली आहे.बीडसाठी विकासाची सुवर्णसंधीधनंजय मुंडे यांनी आपल्या पत्रात नमूद केले आहे की, हा महामार्ग केवळ वाहतुकीपुरता मर्यादित नसून बीड जिल्ह्यासाठी आर्थिक, औद्योगिक आणि सामाजिक परिवर्तन घडवणारा प्रकल्प ठरू शकतो.
विशेषतः परळी येथील प्रभू वैद्यनाथ ज्योतिर्लिंग या महामार्गापासून अवघ्या १५ किलोमीटर अंतरावर जोडले जाणार असल्याने धार्मिक पर्यटनाला मोठी चालना मिळणार आहे.यामुळे देशभरातून येणाऱ्या भाविकांसाठी परळी, अंबाजोगाई आणि आसपासच्या भागात पोहोचणे अधिक सुलभ होणार असून, स्थानिक व्यापार, हॉटेल व्यवसाय, वाहतूक आणि सेवा क्षेत्रात मोठ्या प्रमाणावर रोजगारनिर्मिती होण्याची शक्यता आहे.
शेतकऱ्यांसाठी दिलासादायक प्रकल्पबीड जिल्हा हा प्रामुख्याने शेतीवर अवलंबून असलेला जिल्हा आहे. मात्र दळणवळणाच्या अपुऱ्या सुविधांमुळे येथील शेतकऱ्यांना आपल्या शेतीमालाला योग्य बाजारपेठ मिळण्यात अडचणी येतात. लातूर–कल्याण जनकल्याण महामार्गामुळे बीड जिल्ह्यातील शेतकऱ्यांना कमी वेळेत आणि कमी खर्चात आपला शेतीमाल मुंबई, कल्याण, पुणे यांसारख्या मोठ्या बाजारपेठांमध्ये पोहोचवणे शक्य होणार आहे.
यामुळे शेतमालाला चांगला दर मिळण्यास मदत होईल आणि शेतकऱ्यांच्या उत्पन्नात वाढ होण्याचा मार्ग मोकळा होईल, असेही मुंडे यांनी पत्रात अधोरेखित केले आहे.बीड जिल्ह्याची विद्यमान परिस्थितीधनंजय मुंडे यांनी पत्रात बीड जिल्ह्याच्या विद्यमान परिस्थितीचेही वास्तव चित्र मांडले आहे. दुष्काळ, पाणीटंचाई, शेतकरी आत्महत्या, बेरोजगारी, युवकांचे स्थलांतर आणि मर्यादित औद्योगिक वसाहती या समस्यांशी बीड जिल्हा गेल्या अनेक वर्षांपासून झुंज देत आहे.
अशा परिस्थितीत या महामार्गाच्या माध्यमातून चालून आलेली विकासाची संधी जर हिरावून घेतली गेली, तर ती बीड जिल्ह्यातील जनतेवर अन्यायकारक ठरेल, असे त्यांनी स्पष्ट शब्दांत म्हटले आहे.जनआंदोलनाची शक्यताहा महामार्ग बीड जिल्ह्याऐवजी अन्यत्र वळवण्याचा निर्णय झाल्यास, जिल्ह्यातील नागरिक, शेतकरी, व्यापारी, युवक आणि विविध सामाजिक संघटनांमध्ये तीव्र असंतोष निर्माण होऊ शकतो.
प्रसंगी लोकशाही मार्गाने जनआंदोलन छेडले जाण्याची शक्यता नाकारता येत नाही, असा इशाराही धनंजय मुंडे यांनी दिला आहे.त्यामुळे शासनाने जनभावना लक्षात घेऊन आणि नैसर्गिक न्यायाच्या भूमिकेतून या महामार्गाचा मार्ग बदलू नये, अशी ठाम मागणी त्यांनी केली आहे.मुख्यमंत्र्यांकडे अपेक्षालातूर–कल्याण जनकल्याण द्रुतगती महामार्ग हा केवळ एक रस्ता नसून, तो मराठवाड्याच्या विकासाचा कणा ठरू शकतो.
त्यामुळे राज्य शासनाने मूळ नियोजनानुसार हा महामार्ग बीड जिल्ह्यातूनच राबवावा, अशी स्पष्ट विनंती धनंजय मुंडे यांनी मुख्यमंत्री देवेंद्र फडणवीस यांना केली आहे.आता राज्य शासन या मागणीवर काय निर्णय घेते, याकडे संपूर्ण बीड जिल्ह्याचे लक्ष लागले आहे.
हा महामार्ग बीडमधूनच जाणार की मार्ग बदलला जाणार, यावर जिल्ह्याच्या भविष्यातील विकासाची दिशा मोठ्या प्रमाणावर अवलंबून असणार आहे.
अंगनवाडी अवकाळी पाऊस एक लढा मातीसाठी एक्सीडेंट कारवाई क्राइम न्यूज बीड गोपीनाथराव मुंडे ग्रामीण बातम्या जिल्हाधिकारी विवेक जॉन्सन जिल्हा निवडणूक विभाग धनंजय मुंडे नाना फाऊंडेशन निवडणूक आयोग नेकनूर पोलीस स्टेशन पंकजा मुंडे पंचायत समिती निवडणुका परळी पोलिस कारवाई प्रशासक राज बीड घटना बीड जिल्हा बीड जिल्हा परिषद बीड जिल्हा बातम्या बीड ताज्या घटना बीड तालुका बीड न्यूज मराठी बीड पोलिस बीड बातम्या महाराष्ट्र महाराष्ट्र गुन्हा अन्वेषण विभाग महाराष्ट्र राजकारण मुंडे कुटुंब मुंडेप्रेमी युवा शेतकरी रस्ता सुधारणा राजकीय बातम्या राज्यस्तरीय रोड वनविभाग शाळा शेतकरी शेतकरी समस्या सामाजिक आंदोलन सामाजिक जाणीव स्थानिक स्वराज्य संस्था
